تاققا- تاق دؤیدو آچینجا قاپینی گئتدی یاریم

الیم آغزیمدا قالارکن اوزونو دیتدی یاریم

اینجه بئللردن ایراق قالین اولار ایت دریسی

دئدی جئیراندی گومان گوزلرینی اوپدی یاریم

دئدیم آی حلقه یازیقسان باشیوا گلدی هاوا

کول باشیمدان کئچه لی زولفومو پیس یولدی یاریم

لوت آیاق یئشدی بونامرد تایی یوخ

میخی باتمیشدی سوزه رکن قانی تئز سیلدی یاریم

اوره ییم زوزووا چکمکده بو بارماق کئی ایدی

یازیدغیم دیوانا بیر خط نیشان چکدی یاریم

روحوموز چؤکدو دیزه جان دئیرک  قاتدی یئنه

خوش خیالی ایله اوچوب گویلره باش ووردی یاریم

دئدیم انصاف ائله گویلرده نه وار سوز بزه دی

چیخادارکن بو سوزومدن گوزومو اویدی یاریم

دیلیم آغزیم قوروسون شیرینه فرهاد دئیه لی

دئدی یالوارما الیمدن الینی اوزدی یاریم

دوشدوم آردینجا بو لیلا منه مجنون دئمه دی

قاش قاباقلا سوکوب آخیردا منی قوشدی یاریم

دئدیم اولسون بو وفاسیزلارا بئل باغلامایین

قوروموش بیر آغاجی یاش شووه تای کسدی یاریم

ائله کی کسدی قورتولدو آییمی پارچالادی

سانکی اوز شکلی دوشوب چاییما جوت بولدی یاریم

بولدو هئی بولدو یئنه چیخدی آییم باتانمادی!

گون کیمین پارلادیم آنجاق دوداغین بوزدی یاریم

وار یوخومدان دئمه دیم من توفاغین داغیتمیشام

قان یاخیلمیش دیله یه بیرده گوزون تیکدی یاریم

متحیر باش آچیق هایینی آتماز باشینا

گولومون عطرین آلیب یاد باشینا سپدی یاریم