سحر اولدو گوزلریم یومول دا قوی یاتاق بیرآز

دونیانین  ان ـ بویونو گوزدن آتیب داناق بیرآز

گئجه‌نی سات گونوزه گونوزده یات گئجه ن کیمی!

عومرودن تورشوقویوب هر گله نه ساتاق بیرآز!

یایی قیش کیمی  کئچیرده‌ک  قیشی میزدا ترلییه‌ک

چیلله میزدن اودالیب قارپیزینا یاناق  بیرآز

شاه داناینان دوروشوب پایین قویاق تئز اووجونا

نوخودو پشمه‌یی نن گوله شدیریب یوراق بیرآز

دویوشون چکمه لرین باریش یولوندا خرج له‌یک

یوخوموزدا توی توتوب آرزی لارا چاتاق  بیرآز

نییه بس بیر آزدئدین یاخشی پیسین قاناق گره‌ک!

دوغرو سوزدن یالانی سئچیب دوزون توتاق بیرآز

زور بولاقدان سوز آچیب  ایشگه سویون ساچین  حوره‌ک

یوخسا  دام ـ داز باشینا توک اکدیرب یولاق بیرآز

اوره‌یین بویوک لویون کیچک لیینده آختارین!

تاپا بیلسیز  تاپین اولسون قولاغین بوراق بیرآز

یئکه دام ـ داش یاراشیق دیر ساری کوینک اینه یه

قارامالدان سئچه بیلسن سودونو ساغاق بیرآز!

ایگید اوغلان قیزابیر قاریش حه یط سودگولودور

وورابیلمز آیاغین یادسویونا دوناق  بیرآز

سئچه بیلسن  سوز و باش توولاماسان یوخسا  دوش اوز

دئمه بوم ـ بوز دو گوناهدان  چه کینیب قاچاق بیرآز

سپ سرین «اراخ» کیمین قاینا ،یازیق جهنمه!

سنده شئیطان سودویون چک باشینا اوچاق بیرآز

لاغا قویماز متحیّــرده حلال کئفلی سیدیر

دیه رین من بیلیره‌م دین دئیه‌نی سایاق بیرآز!