آز دئه صاف ـ سوللو دونوندان چؤرویوم مین ایل یاشار

یاپراق آد قویما یاشیل دون کؤتویوم مین ایل یاشار

جیریغیمدا جیریغا کئچسه من حاتم یاشارام!

دئمیرم اتین تؤکولسون سومویوم مین ایل یاشار

یاخشی لاردان  دولو  کؤنلوم  پیسه  آچماز  الینی

هله بو اود ساماواردا لولویوم مین ایل یاشار

سورومون قورخوسو  یوخدور گزجک  آیین شایین

چوبان ایتدن باج آلارکن چوچویوم مین ایل یاشار

قونشونون آیرانینا تورش دئمدیم خوش یاشاسین

اؤزومه باش قاتالی جان دومویوم مین ایل یاشار

جانیما  برک  سینر  آنجاق  یاریمین  جان  دئمه سی

بارماغیندان دادانان گئنج اوزویوم مین ایل یاشار

قوجالیق عشقی آیاقدان سالا بیلمز آرازیم!

قورومازدیر عمان آدلی کؤپویوم مین ایل یاشار

قوروما دؤولتینی بویوردو گؤز دیمز اونا

ائو ائشیکدن نه دئییم دار- دودویوم  مین ایل یاشار

چیل- چیراغلی سارایین بیر شئی  یه  دیمز  بیلسن

آز دئه ترکؤینه  یه باخ سؤکویوم مین ایل یاشار

دیل داماقسیز یاشاییش چؤر- چؤپه بنزر سامانیم!

قولباغیمدان نه دئییم قان کولویوم مین ایل یاشار

ایپیمی قیرسا منیم تکجه بو شیرین قیراجاق

متحیردی بو فرهاد بولویوم مین ایل یاشار

شهریارسیز منه مجنون دئسه لیلام اؤلرم!

بو ائشیلمیش اوره ییمدن هؤرویوم مین ایل یاشار