آی پارچالاری خوش گؤروشر تبریزه قوربان

اود قیرنالاری برک اؤپوشر تبریزه قوربان

اولدوز دیلین اؤپمکده فلکدن باج آلار گون

سیرکه م  دئیه  بال سیز اؤتوشر تبریزه قوربان

یاس خونچاسی توی خونچامیزا بوی دئیه بیلمز

کؤز تک اوره ییمله سئویشیر تبریزه قوربان

انسان بزه ییندن دئسه هر کیم قولاق آس سن

هئچ بیر آلا چیله گؤر، دوشر تبریزه قوربان

پیشمیش سؤزه چوخ موشتری وار قوی یاغادوشسون

چکدیکجه سویون یاخشی بیشیر تبریزه قوربان

بوز پارچاسی هیم بیرلشه بیلمز اود- آلاولا

ایلغیمسا بو آرزیم بلله نه جک تبریزه قوربان!

بوللوقدا گؤزآچمیش پاخیل اولماز دئدی حاتم

هاردان بو ایپک دون بوزوشر تبریزه قوربان

یار کولگه سی دوشدوکجه کؤنول تر تؤکر آنجاق!

آیسیز لا گون تک دؤیوشر تبریزه قوربان

آللاه   وئره نی   شئیطان   الیمدن   آلا بیلمز

سانما چیلیس اولدوزلا ائشر تبریزه قوربان

فخریم بودو لیلا کیمی مجنون آد قازاندیم

چؤللرله   سئوینجیم   مله شر   تبریزه   قوربان

عشقین داوامی دونیادا هئچ زاددا تاپیلماز

کال – کولسا بو عشقیم یئتیشر تبریزه قوربان

گوندن  قاماشارمی  متحیر  گؤزو هیهات!

گون شهریاریملا اؤپوشر  تبریزه  قوربان!