کسه بیلسن آیاغین کس بو اوزون دیللرینین

ده دسین یاندیریب  آی- گون  ننه سیز ایللرینی

گونو آز سات گونه بو چئینه توچوردن نه چیخار؟

عؤمرونون قیمتی وار دسته یوران پیللرینین

کئچه جکدن  دوغولان  ایندی یه  چاتماز  گلجک!

باغری قاندیر عصاسیز یولدا قالان شیللرینین

انسانین آلت دریسی اوسته کیلردن بیلینر

انگی بوش دول کیمی قارغیش توخویان میللرینین

شانسی اکسن بو اومودسوز چؤله ایکاش بئجرر!

دردی آرتمازمی قاریشقایلا گزن فیللرینین

دلی آد قویما بو مجنونلارا سن لئیلی یاشا

     کئفی سازدیر دئیه سن باغداکی نیسگیللرینین

قارنی  آجماز  کؤنلو  توخ  کیشی یه  ملک دئمم

شانی آرتیقدی قفسدن یورولان زیللرینین

حامبال آد قویما یوکون خوش چکن اوغلان خان اولار

اوزو آغدیر بو رعیت کیمی چیل- چیللرینی

شهریارین دوزونو دادمامیشام ثریاسیز

چوخ یاواشدیر آیاغی یولداکی بیرتیللرینین

قول- قانادسیز قوشا بولبول دئین آنلاقسیز اولار

قفس  ایچره  کسیلیب  چهه چهی  کاکیللرینین

تبریزین  قونقا باشین  اویدی گولوستان باغیمیز

دده وایدان  دولودور  آلمالی  زنبیللرینین

متحیر نه دئسه اویما اونون سؤزلرینه!

دادی آغزیمدادی ازگیل کیمی نارگیللرینین