سینه بیر دشت مغاندیر قوزو یان- یانه یاتیب

خوش امیر  لئیلی قوجاغیندا  کی  مستانه  یاتیب

سانما بیدار اولاجاق جامی ازلدن دولدور

اودوزوب عاشیقه تای عقلینی دیوانه یاتیب

بوتون  عالم لری  عشقینده  یامان  اویدوراجاق

باشین اوندان بونا بوندان اونا بیگانه یاتیب

یون بالیشدیر ائله بیل ایستیسی باغرین دلیری

وای قیامت قوپاجاقدیر اؤزو پیکانه یاتیب

او نه اوخدور کی اورک دلمه ییب آمما آپارار

دلی جئیران کیمی قاچماقدا نه فتانه یاتیب

حاجتی یوخدور گوونسین بئله قوندارما باشا

دیلی دیش دورماز اونون بللیدی خصمانه یاتیب

هله قوی بیر گؤروم آغزیندان اوزاق تر- تلسیک

اوره یین بندینی قیرماقدا نه شیرانه یاتیب

قامتی شمع دن اوجا شعله سی گوندنده بتر

کول اولان جانی سوورموش گویه پروانه یاتیب

بزه یی  اولدوز اولان  آیه نه  لازیمدی دوزک

اله نیبدیر نئچه مین گؤی یئره مئیخانه یاتیب

وصفی گلجک سویولوب آلت دریسی قالماز اورک

قاپیسین باغلی قویوب آند اولا قرآنه یاتیب

داها گؤرمز دلی دیوانه اولان کیمسه بو گون

درسی تعطیل ائله ییب مکتبی ویرانه یاتیب

شهریارین سؤزونو سن متحیردن ائشیت

شان عارفدن اوزاقدیر بئله رندانه یاتیب