آز سؤیله بو فرهادیمه شیرین دوداغیندان

لئیلا کیمی مجنوندا اوموبدور اوجاغیندان

دونیامی ووروب بیر- بیرینه نازلی باخیشسلار

خوشدور منه یاریم دئیه ایچمک بولاغیندان

مین اینجه بئله دیمسه آغ بیرچه یی داننام

ایسلانذی جانیم چؤل کیمی یاغمور یاناغیندان

ائل- طایفا نه لازیمدی بو نیسگیل منه بسدی

اولدوز کیمی آخدیم یئره بیردن قوجاغیندان

سس سیز  گلیبان گئتمه یی  شاخدیردی یئریمده

شیمشک ندی آی- گون توتولوب قاشقاباغیندان

عشق اهلینه دونیا قارا دوستاقدی عزیزیم

کئچمیردی دئیرسن بو دومان کار قولاغیمدان

ایلنسه بو داغ دوشلره چن تک گؤزون آچماز

دوغرانسادا آسلان کیمی قاچماز قاباغیندان

قورد آلقیشینا  تولکو سئوینمز اوره یینده

بوش قارنیمیز اومماز دئدی نامرد تاباغیندا

  مرد اوغلانا بئل باغلایانین باغری دلینمز

آز قالدی توکولسون یئره سوز دیل قالاغیندان

دیلسیزلره دیل تؤکمه یی  بیلمه میشم من

غئیرت کانی دیر گول کیمی اؤپدوم آیاغیندان

بوی دورماسا آرزین آراز ایچره بوغولارسان

جومسادا چتین واختدا یاپیشدیم قیراغیندان

یاریم متحیردی بو اوزگونچولویومدن!

یاندیقجا دوداغیم یئنه امدیم دوداغیندان