چوخ گولوم وار آمما بیلسین شهریار اولماز منه

گؤز یاشیندا سیلسه سیلسین شهریار اولماز منه

تبریزین وصفینده شیراز آغلاسا قوی آغلاسین

حافظیمده گلسه گلسین شهریار اولماز منه

کیم مخاطبدیر ولایت شاهینا یا مرتضی؟

مدعی قلبیم آییلسین شهریار اولماز منه

منده عرفانه  چاتان  دعویسینین شاهیدی یم

قوی فلک یانسین یاخیلسین شهریاز اولماز منه

منت دونانی چکمز طبعیمیز مولا طبعی!

سوفره سیز حاتم قیسیلسین شهریار  اولماز منه

مین بیر آدلی یار گلندن دوشدو گؤزدن دونیامیز

هئی بزندیقجا ازیلسین شهریار اولماز منه

قورخوموز یوخدور جهنمدن بهشتی بوشلادیق

عشق، هوسدن قوی سئچیلسین شهریار اولماز منه

"ختم الله علی قلوبهم" گؤرر بیزی

کور نامازین قیلسا قیلسین شهریار اولماز منه

هو معلم بیزه هیجران سؤزونو وصلت ائدیب

نی ایله مینلر مئی ایچیلسین شهریار اولماز منه

حی و لا یموتیله اؤلوم سؤزو یوخدور بیزه

       گول دئین دیللر دریلسین شهریار اولماز منه

حق تیکاندیرسا قوی تاخیلسین بیرده بو باطیل گؤزه

بیزله شن دردیم دئشیلسین  شهریار  اولماز منه

 گوشه وحدتده مین- بیر دردیمیز درمان تاپیب

آد سئون شاعیرده بیلسین شهریار اولماز منه