گل ییغیشدیرما بو میخانه نی چوخ گورمه منه

چشم زاریمدا کی فتانه نی چوخ گورمه منه

صف چکیب قتلیمه مژگان بلادن نه دئییم

آدی لیلا دلی دیوانه نی چوخ گورمه منه

منه مجنون دئمه فرهاددان اوتان کیمدی شیرین؟

آجی می دن دولو پیمانه نی  چوخ گورمه منه

سنه قوربان کسیلندن  گونوم آخ وایلا گئچیب

آییم اولدوز سا بو دوردانه نی  چوخ گورمه منه

گولو دیندیرمه گولوستاندا خزان وقتی جانیم

شمع کیمین یاندی بو پروانه نی چوخ گورمه منه

شادلیغین قیمتی جاندیر دوداغیمدان چیخالی

روحوم آغلار دئیه غمخانه نی  چوخ گورمه منه

بو نه غمخانه دی یارب تایینی گورمه میشم

زلف یاریمدا گزن شانه نی چوخ گورمه منه

لب خندانی آچیلمازدی کونول غنچه سی تک

آیاق آلتیندا قالان دانه نی چوخ گورمه منه

بئله بیر دانه نی  یئر  سهلیدی گویلرده دانیب

عشق آدیله دوزه لن خانه نی چوخ گورمه منه

عاشیقین قدرینی معشوقی بیلر صرافا باخ

بو قیزیلدان دولو ویرانه نی چوخ گورمه منه

بئله ویرانه یه  یارب من  اوزرلیک  سالارام

قویما گوز دیسین او بیگانه نی چوخ گورمه منه

متحیردی بو عارف کیشیلر قامتینه

چاره میز  گریه  طفلانه نی  چوخ  گورمه منه