مندن سنه سلام اولسون ناز اوغلوم

اوچونجونو قوی من دئییم یاز اوغلوم  

یاس گونومده سن سن منه ساز اوغلوم 

قوربان کسیم یاسینیوه شرطیوه

فخر ائیلرم دوستلار ایچره شستیوه

***

شهریارین اوز توپراغا قویاندا

شعرلر سؤزلر آلوو چکیب یاناندا

 تبریز یمیز اوره یینی  ا و یاندا

سلام اولسون دئدیم دوغوم گونونه

یوز آفرین اولو شاعیر اونونه 

***

حیدربابا شهریارین هایاندا؟

 گول چیچه یین  قئئرت –  عارین   هایاندا؟

آشیقلارین اوز ووقارین هایاندا؟

یاد   ائدریک  وطن  اوغلون  هر گئجه

قانلی باغریم سوکولمه سین بس نئجه؟!

***

ماتم یئلی بایراقلاری ییخاندا

 بایرام  گولو،  قار چیچه‌یی  چیخاندا

آج قارینلار قورساقلارین سیخاندا

دوستو    آتان   با غری   گوروم   قان   اولسون

دوست   دوستونا   یئری   واردیر  جان     اولسون


حیدربابا سئل سارانی آپاردی 

دوداق بوزوب اونو بیزدن قوپاردی 

بو یئرلرده بیر گون   به یلر   چاپاردی 

  ایندی ائلین آدی قالیب بو یئرده 

اؤتن گونون دادی قالیب بو یئرده

***

حیدربابا سنین سازین ساغ اولسون 

اوغلون قیزین انسانلیقدا داغ اولسون

سندن سونرا ائلین اوزو آغ اولسون

بیزیم دونیا  قرآن سئون  دونیا دیر؟ 

  بیه نیبدیر   آللاه    دئین    دونیادیر!

***

حیدربابا اوغلون سندن تئز  دویدو

فلک بیزی  اونسوزدا  یالقیز  قویدو

گؤزموزو کیم  چیخاردی  کیم اویدو؟

بیلمز ایدیم  دنیزلر  وار  بوغوم  وار 

یاغیش اولار،دومان اولار، بیرده قار

***

هر زاد  ادب - ارکان  بئله  گتیرمز

 کروان کئچر  یول- یوللاغین ایتیرمز 

شیرین آغیز آجی بالی گؤتورمز

بیزده سئو دیک سن سویله ین سؤزلری

اولو  تانری  باغشلاسین  بیزلری

***

 حیدربابا  گول شکر بسله ننده

بئشیک اوسته آنام باخیب گولنده 

خان  ننه میز   ناغیللارین   دئینده 

بئشیییمدن چابالاییب چیخاردیم 

بالیق  کیمی  اؤز کونلومو  سیخاردیم 

***

بیتسین بو  دونیانین یئتیم قالماسی

آهدا دوغوب قاندا بوغان قایداسی

باش  قاتماسی  عؤمورو  گونو  آلماسی

شیرین   دیلین   یادیمدادیر   هله  ده 

اونوتمارام  نئچه  دووران  گله ده

***

 یاز گلنده کندین آخشام چاغلاری

 گول چیچکله  بسله نن  یارپاقلاری

گلینلرین باشیندا  آل- آغلاری

سئویندیرر  آداقلینی  گیزلیجه

دردلی  آدام  دئیر آغلار  هر گئجه

***

حیدر بابا  کندین  گنجی قوجاسی

  گلینلرین تویدا یاسلی حناسی

اوغلان قیزین گؤز یاشلاری دوعاسی 

کسر  یولسوز  ظالیملرین  آمانین

یئل آپارار قولدورلارین دومانین

***

حیدربابا یالان بیزی اوزدوروب

آشیب داشان بولاقلاری  سوزدوروب

تر داملاسین   کیپریییمه   دوزدوروب

قان  تر   ایچره    بله شمیشم     آل    قانا

دوز  بیلمه ین  چوخ   چتیندیر  سؤز  قانا

***

ساغ سولونا خئییر وئرن جان یاخماز

انسان اولان گونش کیمی داریخماز

آی اولسادا اولدوزلاری هئچ آخماز 

دردیمیزه درمان یازیب شهریار

باللی دیلیم وارسا دادیب شهریار

***

قیزل گونش آلچا ق  دووار  گزنده

قارا بالیق  دار  بانکدا  اوزنده

حئیدربابا  گول  دوداغین  بوزنده

روحون قوشو گؤیدن دوشوب  اؤلردی

قان اوره یین پارچالاردی بؤلردی

***

شانلی بولاقدا دامجی- دامجی دامماسا

آچیق گؤزلر اونا  باخیب  اومماسا 

دادلی  سودان  ایچمه یه   قوش  قونماسا

 گؤزدن دوشر  گویچکلرین   یانار سان

   سوسوزلارین  دردین ایچدن   آنارسان

***

حیدربابا اؤلمکده چوخ سؤزوم وار

یاخشیلیقدا بهشت بویو گؤزوم وار

 ایگیدلرین آلوووندا کؤزوم وار

 یئدیکلری    بال– کره دن   بللنر

سن دانیشان داغلار-  داشلار  دیللنر

 ***

حیدربابا  گیزلی دردین  اوزنده

قاچاق نبی  تای- توشونون سؤزونده

اصلی- کرم  وورغونلارین گؤزونده

آغ کفنین یاخشی  یامان گئییب دیر

اورک قانین دردی قانان یئییب دیر

***

ائل اوره یی  قیلینج  کیمی  پاریلدار

بیرگون گلر قارتاللاردا قاریلدار

ظولم  ائیله ین   تاریخ  بویو  زاریلدار

چوخ چتیندیر آد  قازانماق  گول  اوغلوم

یانساندا، یان سورولما تئز کول اوغلوم

***

حیدربابا   من   گئده لی    سن   قالدین

مندن سورا سینیق سازی خوش چالدین

ائل گؤلومدن یای به قیشی جان آلدین

باتماز آییم اولدوزلارا  باج  وئرمز

باش   وئرسه ده  نامردلره   تاج  وئرمز

***

مکتبده سن قورآنیمی آچاردین

دورنا کیمین آراز اوستون قاچاردین

مولا سؤزون ائشیدرکن اوچاردین

آز اوپمه دیم  مولا   اوپن  تئللری

 خوش کئچمیشم مولا  دئین سئللری

***

علی   کیمی  غم- غصه سیمی    یئیردین

خیالیندا ظالیم بئلین ایردین

سؤزلرینی قولاغیما دئیردین

آی  اؤزومو  او  گیزله دن   گونلریم 

 یار گؤزونه خوش ایسته دن گونلریم

***

اوت  قورودان  داغدان  بیتکی  درردی

یاپراقلارین قوروداردی سرردی

هئچ بیلمزدی دیشدی- باشدی جییردی

هر کیم گلدی تئز درمانین  تاپاردی

گؤیزبانی  داغ   تره سین   قاتاردی

***

دیلی شیشمیش  یامان- یووز دئیردی

یاراشیق سیز گییمینی   گئیردی

سانجیلانمیش   کال- کوللاری  یئیردی

بیز سئوردیک زنجیر اولسون پهلوان

علی دئسین پهلوانلار هرزمان ...

***

 گؤز یاشیمیز  بیزدن  آمان  آلاردی

حافظ سؤزون شهریاریم سالاردی

ثریامیز یئنه حسرت قالاردی 

اولدوزلاری  خوش  گئجه ده  سایاردیق

فرهاد کیمین شیرین سؤزون یایاردیق

***

حیدربابا عشق عالمین گزنده

مجنونوما لئیلیم دوداق بوزنده

اصلی- کرم اورکلری اوزنده

  منیمده او نیسگیللرده پاییم وار

آلوولارین بوغازیندا  هاییم وار

***

 حیدربابا آلقیشلارین ببرلییی

ائل-  طایفانین آچیق  ساده دیر لییی

یوخسوللارین  وارلییا  اسیر لییی

ایندیده  وار  قولاغیمدا  سسله  نر

اوره ییمده  کوراوغلو لار  بسله نر

 ***

بایقوش گلیب بولبول اولماز قفسده!

تاثیر اولماز باطیل سئون نفسده

عشق آدیله عاریف او زمزم هوسده

نه   قایدادیر   صنم لری   دانماماماق؟

حقدن اؤتور تکلی- دیبلی  یانماماق

***

 حیدربابا احرام سؤزون  باشلادیم

انسان اولدوم شئیطانلیغی  بوشلادیم

لبیکیمی قوربانلارلا خوشلادیم

شهریاریم  بیه  نیبدیرمنامی

استجابت آغلار قویوب  دعامی

 

***

حیدربابا نیتلرین دوزلویو

قارداشلارین بیر- بیرینه دومسویو

آشیقلارین شاه دورانی سورتویو

شاعیرلرین   دیلینده   هم   دیشینده

کروان کئچیر  ایری  دوزلر   ایشینده

 ***

 اولدوز آخسا آی گونشیم توی توتماز

مرد اوغوللار نامردلره باش قاتماز

آیی کیمی انسانلاری اویناتماز!

بد گؤرمه سین  کافیرینده  بالاسی

بیرگون گلر اوچار کافرلرین  قالاسی

 ***

اکینچینین  اوغلو  قیزی  قارداشی

اینامداشین دردلی دردلی سیرداشی

دونیا سئون اوز سوزلرین اویناشی

 بیر حقیقت  بیر  دانیلماز  امکدیر 

قارا  اوزده   سانما   بزک - دوزکدیر

 ***

 ائو ائشییی  گوله- گوله  سولاردیق

باغچا- باغین تیکانلارین یولاردیق

اوست –باشی، پار- پالتاری بولاردیق

جوقا قوروب اوزلری گولدورردیک

قوناقلارا نه ائتمه یی بیلردیک

 ***

دیلی  شیرین  داغلاردا آت سورردی

دوشمنلری کؤ پک  کیمی هورردی

چون هرزادی آچیق  گؤزله گؤرردی

قانمازلارین قاباغیندا دوراردی

سوباشیندا باغداشینی قوراردی

 ***

 داغ  دؤشونده آخشام چاغی گزردیک

باغ باغچانین اریکلرین درردیک

دامدا گونش قاباغیندا سرردیک

 اوندا کؤنول  قوشلاریمیز   اوچاردی

قانادلاری  کول  اولماسین  قاچاردی

 ***

گولشچیمیز باطیللره گولشمز

حق دئینه انصافلیمیز اریشمز

ایری  دوزه، دوز ایرییه  گیرشمز  !؟

دیرشن لر  سوروشرکن   اؤلرلر

عدالتین شیرین دادین بیلرلر

 ***

 بولبول ائوی قارغالارا یاراشماز

 کهلیک  اولان دوشانلارا  قاریشماز

یوخو چیلار    یوخودادا   یاریشماز!

قاققیلداماق ممکن اولسا قاققیلدا

اودان گونده آراز کیمی شاققیلدا

 ***

آخشام چاغی دینجه لردیم  اذاندا

خزل فرعون بوغولوبدور خزاندا

موسی دئمزندن قالیب زاماندا ...

 یوسف لری  زولیخامیز  بوغانماز

علی میزین  تایین  دونیا  دوغانماز

 ***

 چالیشماسا  قافان بیل کی صغیرسن

اوشاق کیمی تئز باریشسان کبیرسن

جناس    شئری     پایه گذار   نصیرسن

هر گؤزلدن گؤزل منیم یاریم دیر

من  یاریمام  یاردا  منیم  یاریم دیر!

 ***

قلم کؤنلون قاپ– باجاسین دؤینده

یار باغینی  آجی  تیکان  سؤینده

اولو چینار چؤر– چؤپلری  اؤینده

گئجه - گوندوز  غم   باغریمی    دلردی

سینیق قلبیم  توتک کیمی ملردی

 ***

 یورغون کورک  قاتلاشاردی  دؤزردی

زحمت  تری  اوز-گؤزومدن  سوزردی

ائل دوشمانی باخیب  دوداق  بوزردی

کیم قورخمازدی شیرینلردن  او گونلر؟

یالان  دئمز فرهاد کیمی  دوزگونلر ...

 ***

آدلیم کندلی یوخسولاری داناردی

اوشاقلاری تؤر- تؤکونتو ساناردی

هرکس اؤزون تپیک آلتدا آناردی

کیم آلچاقدیر؟ اوزون  توتان  کیمسه لر

ظولم اوجاغین قوروب یانان کیمسه لر

***

حیدربابا    دیش دور   ماسان   یئیرسن

 کورکون گئدر یوخ  دیلینی  دیشلرسن

دایازلاری درین سانیب دینلرسن!

یوخ یوخ  جانیم  چاره سینی   تاپاردی

سؤز خمیرین تندیرینه  یاپاردی...

***

آللاه دئین  یورولماییب  یورولماز

شئیطانلارا اویولماییب اویولماز

عشق ائولری اوچولماییب اوچولماز

 ناماز قیلیب، اورکلری آچاردیق

یئرلرندی گویدن- گویه اوچاردیق

 ***

 حیدربابا تای توشیله گزیردیک

خیالیمدا توی خونچاسین بزیردیک

خان اوغلونون باش قولاغین ازیردیک

من سئودیییم اوزوکلرده قاش اولماز

گلیب  گئدن  اوغلان قیزا  باش اولماز!

 

***

حیدربابا یامان گون هشتاد ایلدی

بیر- ایکیمیز شیرینه فرهاد ایلدی

یارسیزا دونیا بویو مین یاد ایلدی

وحدته باخ سن  گؤزلیم  کتاب دا !

کثرتی ایله لذتی داد کباب  دا

***

 سسی چیخماز  آللاه  ووران آغاجین

کیم گؤروبدور خالچامیزدا آرغاجین

دایاغیدیر هر توخا تای  برک  آجین

قوی دئسینلر اونون-بونون چوستووار

کیمن هبیلیر ،آلتی یوخدور،اوستو وار

 ***

حیدربابا من- من دئین واریا  یوخ؟

پیچاق  چکر قورخار آروادلار  یا  یوخ  ؟

آخشام چاغی  های-  کویو  باشلار  یا  یوخ ؟

 بیتر بیر  گون  قانمازلارین  عؤمورو

یئرده  قالار یانان  تاختین  کؤمورو

***

یولدا دئمز بوی منه سن بیز-بیزه

لیلی چؤکوب مجنون ایله دیز- دیزه

گلین داها  یول  یئرییک  ایز- ایزه

آی اولدوزوم گونش دوغوب  داریخماز

چیچکلی آی- گونش گؤیوم قاریخماز

 ***

کیم بیلمیری  دونیا  یالان  دونیادیر ؟

فیرعونلاری  سودا  بوغان  دونیادیر

 قارونلارین بورنون اوغان دونیادیر

ظالیملردن مظلوم حقین    آلیبدیر

آمما چوخو  قیامته  قالیبدیر ...!

 ***

شاهلاریمیز قیزیل تاجین داندیلار

اوز ییغدیغی  تونقاللاردا یاندیلار

حق خنجرین باطیل قینلار قاندیلار!

کاش گورئیدین  نه  تیکانلار  گول  اولدو

نه قصریلر اوددا  یانیب  کول  اولدو

 ***

بیرگون دوشدوک باغلیلیغا، دوستاغا

قاندیق سوزو بیزده باشدان آیاغا

سؤز  گتیردیک انسانلیقدان قاباغا

آز دا نیشد یق، دئد یک کی سؤ ز-سؤ ز  اولسون

 قوی عاغلیمیز ایشیمیزه گؤز اولسون

***

 یاراشیقدیر یوسف لرین  دوزمه سی

زلیخانین دوستاغیندا  اولمه سی...!

قورد داغیدان کوینه یینین دویمه سی

قوربان اؤلوم منده بو  قرآنیما

جان دئیرم میصریده  کنعانیما

 ***

آداملیغی  دار-  دوستاغا  کیم  سالیب؟

عزیزلردن کیم قویلانیب کیم قالیب؟

ارککلرین قاش- گؤزونو کیم آلیب؟

بیزی–بیزدن قوپارماغا  قالخانلار

باشا دوشسون، اؤلو دئییل بو جانلار

 ***

یورغان دوشک چوخ کیشینی آلیب دیر

رعیته ارباب یئرین سالیب دیر!

گول سارامیز خان چوبانا  قالیب دیر

یام- یاشیلدیر آراز ایچره تارلاسی

یومورتاییب مینلر جوجه دورناسی

 ***

هر  قاپینی  دؤیمک  انسانا  ماندی

کیشی اودور، چتین لییه دایاندی

هرکس هایا- کویه اویوب قورشاندی

آیری دوشدو ایگیدلردن ساییلماز

دووشان  کیمی  خوش  یوخودان   آییلماز

***

گوناهسیزین یارالارین باغلاردیق

نه قان تؤکوب ،نه تولکو تک  آغلاردیق

دنیز کیمی جوشقون اولوب  چاغلاردیق

الده قابار، آلیندا تر ایشلردیک

 امک قویوب  چؤره یینی  دیشلردیک

***

تانری بیلن ال اوزالتماز آلچاغا

ائل  ده یرین    سالماز    گلن    آیاغا

ایری باخماز نه قارایا، نه آغا

اوموب- کوسمز   هئچ  بیر زمان  توپراقدان

گیلئیلنمز اینجه ،  یاشیل یاپراقدان

 ***

 قیش گونونده، کندین  سوغوق چاغیندا

قار ایله  شر سولوندا  هم  ساغیندا

  اوشاقلارین تپه  لرده ،  داغیندا

 زویه-  زویه قاققا  چکیب گولردی

قار گئدیین  یاز گلر نه بیلردی

***

شهریارین  سندن  ایلهام  آلماسی

قوناق  گلیب  سنده   آیاق   سالمسی

سیننن اوسته ساعاتلارجا قالماسی 

یادیندادیر  گول –  چیچه یی  سولاردی  ؟

قیز –  اوغلانا یاخشی  گون  آرزیلاردی ؟

***

انسان ایشی  یاخشی– پیسه آینادی

آدمی یولدان چیخاردان حوادی

آز دئه جهنم ایله بهشت بوردادی

گوز  یومانین  قیامتی   باشلانار !

اوندا گورر کیم کیمه برک  داشلانار

 ***

حیدربابا  شهریارین  اولوبدور 

اورکلری پارچالاییب بؤلوبدور

هانسی دوداق اوندان سونرا گولوبدور؟

سولوق چالیب ایچیمیزده  دیلکده

یازیب–  پوزما  سئو ینجیمیز   اورکده

***

گؤزل شعری جان جامی تک  ایچردی

ائشیدنده ایری-  دوزون سئچردی

سؤز دوشمنین  قیلینج  کیمی  بیچردی

دوز  یول  گئدن  ایسته  یینه یئتیشر

بیرگون گلر اسکی یارا بیتیشر

 

***

هر یئرده  وار  داشدا ،گولده  تیکاندا

قاشدا کمان داوارجیقدا  سیچاندا...!

 بس  قارداشلیق  هارا  گئدیب، هایاندا؟

               

                دوز یئریین سویوق سلیمان  اولماز

آللاه سئون  بنده سی   بئیمان  اولماز

 

***

 

 

ایندی قهر بوغازلاری  توتسادا

بیزی بوندان بترده قاتسادا

آلا- آلا      موفته سینه     ساتسادا!

دوزلوک  باشدی قیر- قیزیلا  هرزادا

عمروعاصین یونجا پایی  توربادا...

***

آدام  وارکی،  انسانلیغا تور قورار

قیرقیلاردا   سرچه یه   قان  قوسدورار

بیرگون اولار حق  قولاغین  برک بورار

قبیرلردن باش قالدیرار اؤلنلر

عدالتی  گؤرر اونا گولنلر...!

***

باغ  پوزانلار  باغد ووارین آشاندا

چا لیشقا نین سود  قازانی داشاندا!

قاپیب– قاچان اؤز یولونو  چاشاندا

اوتانجیمدان گؤزوم  گؤرمز  اونلاری

یامان  اولار  اونلارین   دا  سونلاری

 ***

الین  چکیب منیم- یتیم  باشیما

دوغراییبدیر چؤرک  یاوان  آشیما

 وورولوبدور گوزلریمه، قاشیما

منده  بیلیر  هرگئجه   یاد   ائیله رم

روحونو  یاسینله  شاد  ائیله رم

 ***

حیدربابا      غصه ده      وار    شنلیکده

یاشا ییشین    ایچ    دیری   منلیکده

من   دئمه رم  امه  ییمیز  چنلیکده

 بو  چنلییی کئچمه لیییک  ندیرسه  !

هاردان گلیب   هارا  دوغرو  گئدیرسه

 ***

دئمک اولماز سؤزلر بوتون یالاندی

ییغدیغیمیز  بیردن– بیره  جالاندی

ایلانین دا  اینجیمیشی  چالاندی!

 قویروغونو آیاقلاسان دیک دورار 

 توتدوغونو  زهرله یر،  دیش  وورار

 ***

 من  وورغونام  گؤزل گؤیچک ائلیمه

اؤیونورم بالدان شیرین  دیلیمه

دوشمن دوشسه آشیب  داشان  سئلیمه

اوندا بیلر کیم  اویانیب ،  کیم یاتیب

کیمین  گونو، آی  اولدوزو  تئز   باتیب 

 ***

حیدربابا خوش گونلرین قارالماز

سنده   آچان   کول   چیچه ییم  سارالماز

بار وئرمه ین کیمسه  سندن  بارآلماز

 متحیر منیم گؤیچک بالامدی ...!

اوزومه  تای  اوچولمایان  قالا مدی 

 ***

حیدربابا وارلیق قوشون اوچارکن

قارا  اوزلر اوز دؤندریب قارچارکن

 اوره ییمه حکمت نورون  ساچارکن

قاوزان  ائلین  سئو ینجینی آیدا  گؤر 

اؤز  با لا نی آراز  کیمی   چایدا  گؤر

 ***

قان سورانلار ائلین  قانین ایچنده 

یاد اوغلونو  سیرداشلیغا  سئچنده

آرواد– کیشی باش  تولاییب کئچنده

منده اینان  دوستو  یادا  ساتمارام 

ایری-  دوزو،  بیر- بیرینه   قاتمارام 

***

حیدر بابا دیل آچمیشام داغیندا 

قارا گونلر ایتیب باتیب آغیندا 

ائشیم- ائشیم  هورمه لرین  ساغیندا 

 قوی    قیزلا ر ین    قیرمیزی      شال      باغلاسین

قوناقلارین سئوینجینی ساغلاسین!

***

شهریاریم،  روحون  نورو گور اولسون

دونیا وارکن قبرین  دولو نور اولسون

عارسیز دوستون  بو یوللاردا   یورولسون

 کؤنلوم سنی  بیرده  چتین   اونودا

نه "شستلی" سن سؤیله میشدین  یوخدا 

***

اوزاق  یولدان   گلدیم  توتام  الیندن

بالیقلاری  خوش  دیندیرم  دیلیندن 

جان  ساغلیغی  ائشیدم  قیز- گلیندن

خان ننه میز    کربلادن  گلیب دیر

قان  گوزومون   یاشلارینی  سیلیب دیر

***

حیدربابا قلمینده سوز یوخدو!

برک سیلمیشم آیناسیندا توز یوخدو

آیریسیندا بونا تای  بیل کؤز یوخدو

مولاسیندان چوخ چوخ  پایلار آلیب دیر 

دوست دوشما نی عشقینده مات قالیب دیر 

***

آذربایجان قلبی یانان تبریزدی

آجی سوزدن برک- برک  دویان  تبریزدی

شیرینلره فرهاد دوغان تبریزدی

 تبریک دئسین آذربایجان اوغلوما

قوربان کسیم شئر تک سولطان اوغلوما 

***

ائلین باغری جوشا گلیب سوزوندن 

گونش کیمین اؤپموشم آی گوزوندن 

اوره ییمین باشی یانیب کؤزوندن 

 سیزی آللاه قدرین  بیلین  اولمه میش 

آغلاتمایین  یالان  یئره  گولمه میش ..  !

***

بوردا چتین تاپماجالار یازیبلار

ثریا وا  سنسیز قویو قازیبلار

آمما  اونلار یوللارینی  آزیبلار

حق  یولوندا چالیشانلار  یورولماز

باطیل گولو دورولماییب دورولماز

***

دوشونجه نین   هاردا    سؤنوب     چیراغی؟

کیمدیر  اولسون السیزلرین آیاغی؟

تک تانریدیر  انسانلارین  دایاغی

اولو  تانری  گرکسیزدیر ،  تایسیزدیر 

ایستمه سه ،هرگئجه  گؤی آیسیزدیر

***

دیل اوتانیر، اورکلرده سوز قالیر 

اوجاق  یانیر  اوره  یینده کؤز  قالیر 

انسان  اؤلور، اونا  بیرجه  بئز قالیر

 کؤنول دئییر چوخ دوشونمه  آماندیر

گئرچکلری آز سویله پیس زاماندیر 

***

دنیزلره دالغاسیزلیق  یاراشماز

بال   پته یه ،   پتک     بالا  قاریشماز 

یارالاریم دوز داغی ایله باریشماز

آغیر سولار سهندیمده  یاتیب دیر

ساوالان دا اوز  باشینی  قاتیب دیر 

***

گؤزللرین گؤزللییی هاردادی ؟

یوسیف لرین غم، غصه سی بوردادی 

زلیخا نین یوخولاری قاردادی

یالان دئین دیللریمیز اوتانسین

اوز  وئرمه ین ایللریمیز اوتانسین

***

 گوزگولری  توز  بورویوب  کاسلانیب 

آغاجلاردا  قول -بویوندان  آسلانیب 

آتلار اؤلوب  اوزنگیلر  پاسلانیب

 "سهند"یمده یوخدور، "شهریار" یمدا

سانکی  گئدیب دؤولتیمده، واریمدا

 ***

سانجیلاریم قویسا دوغار نیسگیلیم

جوت میلیمیزدن توخونوب  تک میلیم

بوی دئمه ییب  نارگیلیمه  ازگیلیم

تورکو دیلین اؤزگه دیله قاتمارام

شهریارین توتدوغونو آتمارام...!

***

هاردا اوغول دوغانلاری بوغارلار؟

انسانلاری آغاج کیمی یونارلار

یئرده  چکیب  بوینونا  ایپ سالارلار

اویئرده کی باطیل تخته مینیب دیر

حق طمارین آغزین دیلین کسیب دیر

 ***

شهریارین دریاسینی گئچمیشم

حافظیمین جام جمین ایچمیشم

تیکان اکیب سونرا چیچک بیچمیشم

 اولان اولوب  کئچن  کئچیب  دونیادا

جئیرانیمیز قوربان کسیب صیادا !

 ***

اوشاقلیقدا هورا چکیب اویناردیق

جوشا گلیب قازان کیمی  قایناردیق

آتا- آنا  اوره یی   تک  آغناردیق

 آغاجلارین هاچاسینی کسردیک

باغچامیزین تیکانلارین درر دیک

***

خان آدامی دوزگون ایچیب ،یئیردی

قادینلاری قیسا اتک  گئیردی

آداملاری هنده– منده  دئیردی

کؤنوللری  بیرلشدریب  دوراردیق

ناچار  قالیب قوردا  تله  قوراردیق 

***

بوداغلاردا چوخلو جئیران گؤرموشم

بالالارین دسته– دسته سورموشم

تئللرینی تومارلاییب هؤرموشم

اووچولارین قورشونلارین آلمیشام

اونا  گؤره  اورکلرده  قالمیشام 

 ***

دیل  اولماسا  مکتبلردن سوز قاچار

شیخ محمودون گلشنیده نور ساچار 

اوحدی نین  جام  جمی  گؤز  آچار

یئری  واردیر  کریمی ده  یاد  اولسون

مراغه لی شاعیریمیز شاد اولسون

 ***

بو اؤلکده  کوراوغلو  آت  چاپاردی

اود آغزیندان ائلین حاققین  قاپاردی

آختاراردی  یوخسوللاری   تاپاردی

اورکلری  سئویندیرنلر    هانی؟

سود  پایینی  خصمه   وئرنلر    ها نی ؟

***

خاطیرلادیر آتالارین سؤزلری

یاش اله ییر بولود کیمی گؤزلری

لاپ کؤزریر اورکلرین  کؤزلری

بیر  سئل  آشیر  دره  لردن  ،  تپه دن

بو ماتمه نه سن قاریش ،نه ده من

 ***

دوداقلاری کیملر گولوشسوز قویدو؟

ائل دریسین کیم،  شیغادی  کیم سویدو؟

ایستکلیلر بو دونیادان تئز  دویدو

آتام ا ؤلدو  یازیق  اولوب  آغلادیم

یاس گونونده قیرخ گون   قارا  باغلادیم

***

یامان گوندن قورخوب  یامان  قاچمیشام

دوستلاریما یاخشی سوفره آچمیشام

دیه رلی سؤزلردن  اؤترو  آجمیشام

شیخ الاسلام  موعظه نی   باشلادی

روایتین  اوره  ییمیز خوشلادی

 ***

اوره ییمیزیاتماز بیزیم آییقدیر

مذهبینی دانان کیسمه یازیقدیر

کوکلسه ده بیلسین  کی قار- قابیقدیر

اویاق دئمه گؤزو باغلی قول ایمیش

سانکی دونیا اییه سیز  بیر  دول ایمیش

 ***

کیشی- کیشی   اولسا  آرواد  دانلاماز

صبح آچیلسا واختسیز خوروز بانلاماز

سوزوز دوداق هاردا سویو  آنلاماز؟

کیمدیر  گلیب ائل- اوبانی  اویاتسین

اوشاقلاری  جوانکن ده   قوجالتسین

***

حیدربابا دونیا بیزی ازنمز

دوداغیمیز بویاغینا بزنمز

باخچامیزی شیطان ایله گزنمز

آخرتدن دئین دیللر یورولماز

آغ  آتلاری  هله هله  توتولماز

 ***

قولاق  وئرمه  هر  یالانا   آمان دیر

دونیانی  دان  یوخسا  گونون  یاماندیر

بئله  گئتسن  یولون  چندیر،  دوماندیر

 یارانمیسان یئرده اکیب -  بیچمهیه

گلمه میسن   آنجاق    یئییب –  ایچمه یه

 ***

شهریارین  سؤزو  روحو  بزردی

اؤزو دوروب شیرین چایلار  سوزردی

گؤزو بیزده، کؤنلو گؤیو گزردی

ایندیده  وار    یادیمدادیر    گؤلمه  یی

یاواش- یاواش سسسیز  گئدیب گلمه یی

 ***

حیدربابا  خنجرینن  باش- باشا !

قویمامیشام  پامبیق ایله  داش- داشا

گؤز گؤزه قوربان کسیلیب  قاش- قاشا

 آرشینیمیزدان    نه   چیخار   بئز    جانیم 

 برک  اوزو  وار  چیخمایاجاق  تئز  جانیم

 ***

چتینلیکدن  هئچ بیریمیز  قاچمازدیق 

قوناقلارین  یانیندا  سیرر آچمازدیق؟

کؤنوللره غم داراغین ساچمازدیق

خلیل کیمین اسماعیلدن  گئچمیشم

صبری اکیب سونرا ظفر بیچمیشم !

 ***

 شاهچیلارین زور  دئمه سین  گورئیدین

دیرناق چکن نامرد گوزون اویئدین

قوندارما- دیش کیمین انگین  دئشئیدین

ستارخانین  مشروطه سی   دیریلدی

باقر خانین    چکمه لری    گئییلدی

 ***

توفان  دوشدو بیزده  گیردیک مئیدانا

کیم دوزر کی بو انقلاب اوخلانا

قان قوسدوروب  نامرد  شاهلار   ایرانا

قوجا  قوردلار  بالالاییب  دوغموشدو

شینگیل آوا  قوزولارین بوغموشدو

***

بیردن- بیره قورخولاری توکولدو

آچیلارکن اورکلری سوکولدو

باطیل بئللر حق الی ایله بوکولدو

وار - دؤولتی قول چوماقلار  ییغاردی

دینن اولسا ، باسمارلاییب شیغاردی

 ***

اسلام اوچون بوللو  قانلار وئرمیشیک

طاغوتلارا شهید جانلار وئرمیشیک

سانجانلارا  بالی  شانلار  وئرمیشیک

 اؤلوم اولسون آیریلانا بو ائلدن

آراز کیمین سنده کئچمه بو سئلدن

 ***

انسان اودور انسانلارا  گؤز اولسون

دیلسیزلره آغیز  دولو  سؤز  اولسون

ایریلردن درس  آلماقدا دوز  اولسون

اوجا   باشلار   اؤزگه لری به  یه نمز

به یه نمه سین  انسان باشین  ایه نمز

 ***

 عزیز   اولکه م   سنی    سیرداش     بیلمیشم

اوره‌ییمی گولدورموسن  کولموشم

سنی سئویب  شعره    سؤزه گلمیشم

 سهنده  تای  داغلاریمیز   سنده  دیر

جنت کیمی  باغلاریمیز  سنده  دیر

 ***

آدام  وار کی شئیطان اونو قورماسین؟

آلتین– اوستون، بیر– بیرینه  وورماسین

آدم کیمی حوامیزی یورماسین

 آزدیرماسین انسان اوغلو انسانی

آخیتماسین  توپراق   اوسته  آل  قانی

 ***

بوندان سونرا قاراگونه باخماریق

یوخو توتسا اولدوز کیمی آخماریق

آغ  گونلرین  اوره یینی  یاخماریق

 شن  عومروموز قیسا اولماز اوزوندور

قبول  ائدسن  قوربانلیغا  قوزوندور

 ***

گؤیرچین لر یویونوبدور سئلینده

بیلدیرچین لر تئل داراییب یئلینده

سئرچه لرده بایرام ائدیب ائلینده 

اورکلره دایاق دوردو کورکلر! 

کورکلره سازین چالدی اورکلر

 ***

حئیدربابا  تبریک دئییب  تبریزه

آذربایجان قوربان کسیب تبریزه

اوغلان قیز ی  دوز سووز  وئریب  تبریزه

تویوموزدا  ریحان  بیچر  شهریار

سوزلریمی  یاخشی  سئچر  شهریار

 ***

نه دئسه لر   ائمه دن  دؤنمریک  !

قورآن یولون سئچیب یاندیق سؤنمریک

دوز گئدریک ، بوروق  یولا  چؤنمریک

 یول کسنلر باشاردیقجا کسرلر

حاقق اؤنونده  قارون  کیمی  اسرلر

 ***

ابراهیمه  احسانینی  باشلادین ...!

شیطانلاری اوره یینده داشلادین

یارب لرین   اودلار ایچره خوشلادین

توفیق وئردین  منده  ائتدیم  توبه لر

حربه کسیب  شیطان  کیمی  نوبه لر

 ***

حیدربابا یاخشیلیقدان گول چیخار

خلقین ائؤین جهل- تکببر ییخار

ظالیم اولان حق بوغازین  برک  سیخار

ائشیدمزدی کار قولاقلار خوش  سسین

اودانمازدی  بیر  ایچیملیق   جرعه سین

 ***

قولاق  گرک   درین  سؤز  ایله   دولسون

چیی  سؤزلرین  کوکون  اورکدن  یولسون

اوزلر گولسون  دشمنلری  یورولسون

بیزده چاتاق  ایستکلره  دویونجا

دوداق گولسون  آغری- آجی قویونجا

 ***

 بو دنیادان،  او  دونیادان  سؤز  آچدیق

آییق دوشوب  چالا - چوخوردان  قاچدیق

شوکور  اولسون   دؤوره میزه   نور   ساچدیق

چیینیمیزه بایراق آلدیق تانریدان

اوره کلری آیدینلاتدیق تانریدان

***

 آختارمادیم  بلکه  تاپام  یاریمی

یاخین بیلدیم اورهییمه تاریمی

گونو  گوندن  یاخشی  وئردین  باریمی

  اورتانجی اولدوز  منیدیم  آیلارا

اوچوموزده گؤز تیکمیشدیک  آللاها

 ***

 علامه نین   تفسیرینه  پول  یوخدور

چوخ باهادیر میزانینا یول یوخدور

یول گئدمه یه  قیچ  اولسادا  قول  یوخدور

 عیبی یوخدور قاتلاشارام من یئنه

کئفیم یوخدور سازلاشارام من  یئنه

***

اورک  دئییر  گیزلی  یاریم  واریمدیر

ایلکین سئوگیم ،همده کی نوباری مدیر 

سون اومودوم اؤز پروردیگاریمدیر

شاهلار اولوب  اونون  حؤکمو دؤنمه ییب

قلم  سینیب  آلوولاری سؤنمه ییب

 ***

بس هارداسان یئتیملرین آتاسی؟

اورک شیشیب قوجاق دولو یاراسی

یئتیملرین سود دادماییب کاساسی!

یورولموشام مهدیمیزده گؤزوم وار

انتظاردان خلقت  بویو  سوزوم وار