ایچرم جام بلاسین اوپرم من دیلینی

اوزه آخدیقجا قانیمدان بزرم من دیلینی

بو تجارت گره ییمدیر گوزو یومسام چیخادار

یوخسا شیطان ندی  وآللاه کسرم من  دیلینی

بو حقیقت یولونون واردی  چتین دونگه لری

دادی آغزیمدادی یارب گزرم من دیلینی

 منه  یاریم دئمه بیر تخت سلیماندی جانیم

گوزون آیدین دئسه گول تک سپرم من دیلینی

دئنه مجنونا کی لیلا سوزو شیرین دیلی دیر

ائوین آباد اولا فرهاد سئچرم من دیلینی

سنین عشقینده دوشوب چوللره من طفل کبیر

بونه ترکیبدی خدایا بلرم من دیلینی

او اوشاقدیر هله پیس یاخشینی قانماز  نه دئییم

یاشی قیرخ بئشدن آشیبدیر  الرم من  دیلینی

یاشی ایسلانماز اونون دوزدو کامان تایی قاشی

قورو دیلدن نه چیخار هئی چیلرم من دیلینی

قوروسو یانماز اونون باخ اودونوندا سن بویا

آدی قایماقدی قاتیق تک سوزرم من دیلینی

نه شیرین دیر نده توش اصلی سینی کرم بیلر

اودا قاچمیشدی عاریندان بوزرم من دیلینی

دوداغیندان  نه دئییم  شکر  هندویه دیر

قوناغیم چوخدو یاواش کی بولرم من دیلینی

ائله بیل ایش عوض اولموشدو قویون کاباب چکیر

یونجا یئللر اودو منقل تپرم من دیلینی

ائله یورغوندو چورک لر اولوب اوندان یوموشاق

خمیریم چوخ سو آپارماز  سررم من دیلینی

گوزلریندن اومالی مین دوه کروانی گلر

اونا حسرتدی تیکان لار بزرم من دیلینی

بو نه ایشدیر متحیر قابار اللرله یازار

بئله بیر شعری خدایا تیکرم من دیلینی