اوره یین آغریسینی دردینه گیزلین دئمیشم

سانجیلار توی توتالی من گؤزوم آیدین دئمیشم

باسمیشام باغریما یاس گونلرینی گولمز اوز ایله

شهریاریم  گله لی  قان گؤزه یاسین دئمیشم

 فلکین چرخی ثریامیزی سیندیرسادا بیل

اته ییندن یاپیشارکن یئنه آیقین دئمیشم

آچمیشام اولدوزومون آی قولونو گون بویونا

اؤپوشرکن دوداغیندان بالا سیلکین دئمیشم

گاه یانیب، گاه سؤنرم یاش ادونام گؤزله بیرآز

آلیشیب  بیردن  آلوو چکمه یه چیرکین  دئمیشم

تاپمیشام کول دیلینی دولمایاجاق گؤزلریمه!

سورولوب گؤیلره قالخان توزا قیرغین دئمیشم

چاپا بیلمز منی باطیل باخیشا حق دئمرم

قول- قانادسیز قوشا یئرلرده هاچان نین دئمیشم

هره نین   بیر  پایی  وار  اؤزگه  پاییندا  یوخ  گؤزوم!

دوز دانیش کال- کولا عشقیم دئیه یئتگین دئمیشم؟

یوز داشیم اولسادا شئیطان باشینا وورمامیشام

اوز باشیمدان ایری سین گؤرمه ده نارین دئمیشم

باتمیشام شنلییه بایرامدی منامیزدان بوگون

منده نازیک بوغازین ییرتانا قالین دئمیشم

قوربان آد قویموشام من متحیر قوزوما

آغ قاناد روحوما چیخدیقجا گؤیرچین دئمیشم

نئچه ایللردی بو دوستاقدا سورونموش اوره یه

      گؤز قاباغیندا گزرکن نئیه ایتگین دئمیشم؟