ها دئدیم دوز یولا گل سویله ‏دی  قورآنینی دان

کبینیم کفرودور ترسا کیمی ایمانینی دان

اوچدو هئی بیچدی گونش قامتینه بیر قارا دون

دئدی بیر دفعه‏ده اولموشسا بو پیمانیوی دان

چوخ گران گلدی حقیقت ‏ده  مجاز اختارالی

لفظی معنایا قاتیب سویله دی دیوانینی دان

رسمی دیر آب بقا ایسته یه نه یوخدو فنا

خضری اولدوردو با جان اوسته کی حیوانینی دان

چکدی اردینجا فنا دشتی نه ابراهیمه تای

دولانیب باشیما هر گون دئدی قربانینی دان

دوزدو موسی کیمی فرعونلا بویوتدوم سنی من

یئری وار سیندیرا بیلسن  بو نمکدانینی دان

تؤکمه گوز یاشینی گوندوز گئجه لازیمدی سنه

آچما بیگانه یه اوز سرریوی کتمانینی دان

مصحف دلده رخ یاری گورن وقته دئنه

یان  توکول شعله وصلیمده کوز هیجرانینی  دان

دل عشاقی گزه‏نمز دئدی منان رئوف

داشلاسن قوی قاچا یول وئرمه بو شیطانینی دان

بزمه وحدتده آیاقدان سالیب اول جذبه منی

عومرو وئردیم باشا ناریم دئدی رضوانین دان

بیلمه دیم من بو قیامت ده نه لر کئچدی منه

آییلان چاغدا زلیخا دئدی کنعانینی دان

دئدی اصلین دانانی بزمیمه قویمازلار جانیم

سنده یوسف کیمی شیطانزده مهمانینی دان

دانماق آساندی مگر روز و شبیم اولدو سیاه

سالدی زندانه اونا کس دئدی خوبانینی دان

خوشلادیم من متحیر قالالی کنج غمی

حقی واردیر مگر باطیل دئیه جانانینی دان؟!