لیلا ندی کفرومده من ایمانه وورولدوم

عشقین دادی آغزیمدادی قورآنه وورولدوم

حقین دوداغین تیکمه میشم باطیله خاطیر

شاهیددی بو قاضی منه وجدانه وورولدوم

مصرین بازارین یوسفه تای رونقه گتدیم

خامسیتدی زلیخامیزی کنعانه وورلدوم

یارب بو تجارتده یازیق یعقوبا تای من

تای تای غمی آلدیم یئنه احزانه وورلدوم

دولدورماغمین فایداسی یوخدور سئچ آپار سن

سئچدیم تایی نارین ایری خوبانه وورولدوم

مکتبده دیری باشلاریمیز اخیرا قالدی

مجنون دئمه اون دوردومه تابانه وورلدوم

فخریم بودو شاهلیقدا گدا تک بویون ایدیم

وصفینده خطا قیلمادیم انسانه وورولدوم

تکرار الیفبانی بیه نمز بئله  صراف

اخلاصه وئرر پای غم مژگانه وورولدوم

بیر دامجی یاشین قیمتی رضواندی اینانسان

آز قالدی آغارسین گوزوم حیرانه وورولدوم

قوربانلیغا  باش  قالمادی حکمون  ندی   یارب

فقریمده   پیچاق   کسمه دی   احسانه  وورولدوم

المنته للهُّ کی شوکور  آغزیم  آچیلدی

توبه مده نصوحا کیمی غفرانه وورولدوم

یاندیم له له دیم من دئدی کفاره سی جاندیر

غواصه  دونوب  موجی ایله  طوفانه  وورولدوم

تسبیحیمی طوفاندا ایتیردیم دئدی غرق اول

بیردن بیره چیخدیم اوزه پیکانه وورولدوم

بیجا یئره تهمت ندی آز وور منه عارف

جهلیمده  گوزوم گورمدی عرفانه وورولدوم

مولا الین اوپدوم متحیردی  یوخومدان

بیگانه یورانماز بونو میزانه وورولدوم